عايزين نتكلم فى الموضوع ده وخصوصاً إن ده سؤال شبه يومى بيجيلنا لو اتبعنا الخطوات دى الكلب هيعمل فى مكان معين وثابت والكلام ده ينطبق على شقه أو روف أو جنينه

هنبدأ فى الخطوات :

١- لازم تعرف انك هتتعب شويه مع كلبك والموضوع محتاج إهتمام منك ومتابعه

٢- منقدرش تحدد مده معينه هيتعلم فيها الكلب التواليت كل كلب على حسب إستيعابه

٣- لازم تتعرف على طريقة كلبك لما بييجى يعمل تواليت فى كلاب بتلف حوالين نفسها كتير أو بيشم فى الأرض فى أماكن مختلفه أو بيجرى ويدور على مكان يعمل فيه

٤- لازم نجيب تريتس تكون موجوده فى البيت عشان تشجعه وتعرفه ان بيعمل حاجه كويسه

٥- مواعيد التواليت بعد الدراى فود بتبقى من ٢٠ دقيقه لساعه والاكل الفريش بتبقي مده اطول من ساعه لساعتين ومع التدريب هتعرف كلبك بيعمل بعد اد ايه

٦- لازم نثبت مواعيد الوجبات ودى حاجه مهمه

٧- لو عايز كلبك يعمل فى الشارع يبقى هتاخده قبل ميعاد اللى المفروض بيعمل فيه وبتمشيه وميطلعش البيت الا لما يعمل

٨- لو هتعلمه يعمل فى البيت فى مكان اللى عايزينه يعمل فيه هنحط نشارة خشب او ورق جرايد ولو عمل بره النشاره او الجرايد لازم نحطله التويلت عليها او نستخدم اسبراى مخصص بيحفز الكلب يعمل فى المكان المرشوش و بيساعد فى التدريب ولازم لما يعمل فى مكان غير اللى عايزينه يعمل فيه نطهره بحاجه ريحتها نفاذه عشان ميرجعش يعمل فيها زى ( بيكربونات الصوديوم او كلور او خل ) و ممكن نستخدم اسبراى مخصص بيمنع الكلب يعمل فى المكان اللى بيترش فيه

٩- لو أمكن نشيل السجاد من البيت الفتره دى عشان يعرف ياخد على ملمس الجرايد او النشاره

١٠- بلاش الرمله عشان فى ناس بتعود كلابهم يعملوا فيها لانها بيبقى فيها حشرات وريحتها وحشه

١١- بلاش نضربه ونزعقله عشان ده هيوتر الكلب وهيخليه يعمل فى اماكن مش عايزينها وكل ما يعمل فى مكان عايزينه نديله تريتس ونشجعه بكلام يفهم انك مبسوط منه

١٢- وطبعاً غلط ان نحبس الكلب فى مكان عشان نعوده يعمل فيه هو من غير توجيهك ليه هيحس انه متعاقب ومش هيرضى يعمل غير بعد ما تطلعه وهيفضل يلعب لان طبيعى مش هيروح يعمل فى مكان يحس انه متعاقب فيه

١٣- ممكن نساعده فى مرحلة التعليم دى بإسبراى التواليت متوفر لدينا

١٤- طبعاً مع اتباع كل الخطوات السابقه احنا ربطنا كل حواس الكلب بالمكان اللى عايزينه يعمل فيه يعنى مثلاً النظر بورق الجرايد او النشاره والشم لما بيعرف ان ده المكان اللى بيعمل فيه والملمس